Z. Vullnet Doka ka lindur në Kavajë, më 24 prill 1970. Z. Doka është ushtarak aktiv dhe mban gradën Gjeneral brigade.

Në karrierën e tij prej tridhjetë e dy vitesh në Forcat e Armatosura, Gjeneral brigade Doka ka mbajtur pozicione të ndryshme dhe ka kryer detyra të rëndësishme në strukturat e Forcës Ajrore (1992-1998); komandant reparti radiozbulimi (1998-2003); në fushën e inteligjencës ushtarake (Specialist kundërterrorizmi, Analist, Shef Sektori, Zëvendës Drejtor i Drejtorisë së Analizës dhe Drejtor Zbulimi (2003-2016), Përgjegjës Sektori i Transformimit në Drejtorinë e Planifikimit të Mbrojtjes (2016-2017); Shef i Departamentit te Strategjisë dhe Historisë Ushtarake (2018-2020), Drejtor Kabineti i Shefit të Shtabit të Përgjithshëm të FARSH (2021-2022). Gjeneral brigade Doka ka qenë drejtues dhe lektor i Kursit të Lartë të Sigurisë dhe Mbrojtjes në periudhën 2018-2020, në Akademinë e Forcave të Armatosura.

Gjeneral brigade Doka ka përfunduar Akademinë Ushtarake në vitin 1992, në degën Artileri Kundërajrore. Krahas arsimimit ushtarak është diplomuar (DIND) në fushën e drejtësisë në Universitetin “Justicia”, Tiranë (2007-2011), ka përfunduar studimet Master i Shkencave për “Sigurinë dhe Mbrojtjen”, në Akademinë e Forcave të Armatosura (2011-2013), si dhe zotëron diplomën Master i Arteve për “Studime Strategjike të Sigurisë” dhe diplomën e Kolegjit të Luftës, nga Universiteti Kombëtar i Mbrojtjes, Washington D.C., SHBA (2014-2015).

Z. Doka ka kryer një sërë trajnimesh në fushën e inteligjencës, analizës, kundërterrorizmit, planifikimit të mbrojtjes, etj, në SHBA, Gjermani, Holandë, si dhe në shkolla dhe qendra ekselence të NATO-s.

Gjeneral brigade Doka ka marrë pjesë në misionin e NATO-s në Kosovë, KFOR (2017-2018); në misionin e NATO-s “Resolute Support” në Afganistan (2020-2021), dhe në misionin vëzhgues të OSBE-së në Ukrainë, mars 2014.

Ai është vlerësuar me disa medalje për arritje gjatë karrierës së tij, konkretisht, non-art 5 “Operacioni i NATO-s në Ballkan” (2018) dhe non-art 5 “Misioni i Mbështetjes Vendimtare në Afganistan” (2021), dhënë nga Sekretari i Përgjithshëm i NATO-s; medalja për merita të veçanta dhënë nga Shefi i Shtabit të Përgjithshëm të FARSH (2011); medalja e luftëtarit 2022; medalje pesëmbëdhjetë dhe tridhjetë vite karrierë në Forcat e Armatosura (2022), si dhe medaljen “Croce Comemoriativo” dhënë nga Forcat e Armatosura të Italisë për pjesëmarrje në misionin “Mbështetje Vendimtare”, Afganistan 2021.

Zoti Doka është i martuar me znj. Mirsie Doka me profesion financiere dhe ka një vajzë, Adelajda dhe një djalë, Murat.