Presidenti i Republikës: Baza e NATO-s në Kuçovë, një kapitull i ri në historinë e mbrojtjes dhe sigurisë së vendit e të gjithë rajonit
Presidenti i Republikës së Shqipërisë, Sh. T. Z. Bajram Begaj, mori pjesë sot në ceremoninë e inaugurimit të vënies në funksion të Bazës Ajrore Taktike të NATO-s në Kuçovë.
Gjatë fjalës së tij, Presidenti Begaj theksoi rëndësinë e Bazës Ajrore, rolin e saj në aktivitetet e NATO-s dhe përfitimet e Shqipërisë nga ky investim strategjik në infrastrukturën ushtarake, ndërsa e vlerësoi si një kapitull të ri në historinë e mbrojtjes dhe sigurisë së vendit e të gjithë rajonit.
Nëpërmjet kësaj baze, – u shpreh Presidenti Begaj, aleanca dërgon mesazhin e fuqishëm se paqja është një kauzë që nuk njeh kufij dhe dëshmon se NATO është e vendosur të mbrojë lirinë dhe sigurinë e aleatëve, duke garantuar mbrojtje kolektive ndaj kërcënimeve në të gjitha drejtimet.
“Detyrimet që rrjedhin nga anëtarësimi në NATO dhe nga procesi i anëtarësimit në BE janë natyrshëm edhe interesat strategjike të Shqipërisë”, – deklaroi Presidenti gjatë fjalës së tij në këtë ceremoni, ku paraqiti dhe argumentet pse u zgjodh Shqipëria dhe Kuçova për Bazën Ajrore Taktike të NATO-s.
“Ndërtimi i kësaj baze pikërisht këtu dëshmon vlerësimin dhe besimin që aleatët kanë te Shqipëria, si një partnere e denjë dhe e përkushtuar. NATO ka rritur kapacitetet e saj nëpërmjet këtij investimi, duke treguar se rajoni i Ballkanit Perëndimor është i një rëndësie strategjike për aleancën”.
Sipas Presidentit Begaj, Baza e Kuçovës është një qendër e rëndësishme për operacionet e NATO-s, që rrit kapacitetet për të përballuar kërcënimet e sotme dhe të nesërme: “Është investim në kohën e duhur për të forcuar kapacitetet, planet, burimet dhe infrastrukturën e aleancës.
Nga ana tjetër, Shqipëria dhe Forcat e saj të Armatosura përfitojnë një investim strategjik në fushën e sigurisë dhe të mbrojtjes, të munguar ndër vite”.
Duke iu referuar situatës së brishtë në rajon, luftës në Ukrainë, vatrës së konfliktit në Lindjen e Mesme dhe rrezikut të përshkallëzimit të përhapjes se konfrontimeve, Presidenti i Republikës theksoi se ky investim merr një rëndësi të veçantë, sidomos më kushtet kur siguria në hapësirën euroatlantike është në rrezik.
“Ndaj, në këtë botë të ndryshueshme dhe të paqëndrueshme, ne duhet të jemi gjithmonë të gatshëm, jo vetëm për të mbrojtur veten, por edhe për të kontribuar në garantimin e sigurisë, paqes dhe stabilitetit”,- u shpreh Presidenti Begaj, i cili rikonfirmoi se Shqipëria do të vijojë të luajë rolin e saj konstruktiv në rajon e më gjerë.
