20/01/2024• Lajme• Bianka Hada
Presidenti i Republikës, Sh. T. Z. Bajram Begaj, zhvilloi takime me biznesmenët e Bashkisë së Shijakut, të cilët operojnë me investime të huaja dhe shqiptare.
Presidenti theksoi rëndësinë e shtimit të investimeve serioze të huaja edhe të sipërmarrjeve të ndershme vendase, të cilat shërbejnë për zhvillimin e objektivave të qëndrueshëm dhe modele për një të ardhme më të mirë.
Zoti Begaj vizitoi fillimisht kompanitë e hapura si sipërmarrje familjare të vogla pas viteve ’90, të cilat sot janë forcuar dhe kanë hyrë në tregjet ndërkombëtare.
Kompania “Insifa”, me qendër në Maminas, është firmë e 6 vëllezërve Osmani, të cilët e ndërmorën këtë nismë në vitin 1992 përmes një lokali, dhe tani kanë ngritur biznes të qëndrueshëm në fushën e gastronomisë, kulinarisë dhe turizmit. “Insifa” ka, gjithashtu, teknologjinë më të re të prodhimit të ëmbëlsirave.
Presidenti Begaj e vlerësoi këtë sipërmarrje frymëzuese, dukë u shprehur: – “Ky është një shembull se vetëm me punë të ndershme mund të bësh vepra të mira”.
“Ju promovoni emrin e familjes tuaj edhe në shqip. Të eksportosh në 35 vende produkte “Made in Albania”, me cilësi të lartë, dëshmon që ju jeni promovuesit më të mirë të Shqipërisë.” – shprehu Presidenti Begaj gjatë takimit.
Një tjetër model zhvillimi është edhe kompania “Agro Koni” në Koxhas-Fushë, ku Presidenti, gjatë takimit, vizitoi dy serat e këtij agrobiznesi.
Presidenti i përgëzoi sipërmarrësit për investimet në bujqësi dhe bletari, si dhe u shpreh: “Përmes ngritjes dhe fuqizimit të bizneseve, garantohen më shumë vende pune për familjet dhe komunitetet”.
Në nxitje të shtimit të investimeve ndërkombëtare në Shqipëri, Presidenti Begaj zhvilloi dhe një vizitë në “Maccaferri Balkans”, me qendër në Xhafzotaj, degë e kompanisë ndërkombëtare të Italisë , “Maccaferri Group” , lider në tregjet e inxhinierisë civile, gjeoteknike dhe mjedisore.
Presidenti e vlerësoi këtë sipërmarrje serioze dhe u shpreh se Shqipëria ka nevojë për to.
Në këtë filial, ku punojnë mbi 200 shqiptarë, Z. Begaj u prit nga kreu i grupit italian “Macaaferri”, z. Lapo Vivarelli Colonna, me të cilin bisedoi për vlerat dhe vizionin global të investimit.
“Dikur kam thënë se në Shqipëri ka shumë italianë, por pak Itali, por prezenca e grupit tuaj tregon se Italia po vjen me investime serioze”, – u shpreh Presidenti Begaj.