Presidenti Begaj në Elbasan: Qyteti që ruan trashëgiminë historike, kulturore e industriale të rëndësishme për Shqipërinë, përcjell dijen dhe dialogun ndërfetar
Presidenti i Republikës, Sh. T. Z. Bajram Begaj, zhvilloi sot një vizitë në qytetin e Elbasanit, ku u takua me autoritetet drejtuese të qytetit, sipërmarrës, nxënës të shkollës profesionale, pedagogë, përfaqësues të artit, kulturës, komuniteteve fetare dhe qytetarë të Elbasanit.
Pasi u njoh me projektet zhvillimore dhe punën që Bashkia e Elbasanit bën në bashkëpunim me komunitetin, Presidenti vlerësoi vëmendjen që ky institucion i ka kushtuar fuqizimit të shoqërisë civile për një ekspertizë dhe konsultim komunitar në funksion të përmirësimit të jetës së qytetarëve.
“Kënaqësi të jemi në Elbasan, në një qytet me një trashëgimi historike, kulturore e industriale të rëndësishme për Shqipërinë, me njerëz punëtorë e bujarë, sakrifikues për mirëqenien e jetës së familjeve të tyre”, – u shpreh Presidenti.
Më pas, Presidenti Begaj bisedoi me shkrimtarë, artistë dhe përfaqësues të jetës kulturore në një takim të zhvilluar në bibliotekën e qytetit, ku përgëzoi stafin për ruajtjen e pasurisë së fondit arkivor, ruajtjen e trashëgimisë së librit dhe qasjen ndaj dijes. “Ruajtja e ekzemplarëve të rrallë është vërtet për t’u vlerësuar”, – u shpreh Presidenti ndërsa vizitoi Bibliotekën “Qemal Baholli” dhe fondin e Albanologjisë “Lef Nosi” të kësaj biblioteke.
“Elbasani, – u shpreh Presidenti, është qyteti i babait të gjuhës shqipe, “Kostandin Kristoforidhit”. Qyteti i arsimit, që ka përgatitur ndër dekada mësues për Shqipërinë, Kosovën e Maqedoninë, meriton të shndërrohet në qytetin më të vizitueshëm në Shqipëri në këtë këndvështrim.
“E çmoj me shumë rëndësi të takohem me ju si kontribuesit më të rëndësishëm të gjuhës e kulturës. E kam parësore vëmendjen ndaj të gjithë atyre që kontribuojnë për ruajtjen e pastër të gjuhës shqipe. Kush merret me librin, pasurohet dhe pasuron Shqipërinë”, – theksoi më tej Presidenti Begaj.
“Jam i lumtur që trashëgimia kulturore në Elbasan duket e realizuar”, – u shpreh ai, duke vlerësuar praninë e shkrimtarëve të rinj e të vjetër në këtë takim, të parin që një President i Republikës zhvillon me këtë përfaqësi.
Gjatë vizitës në Elbasan, Presidenti i kushtoi një rëndësi të veçantë kulturës së dialogut dhe respektit ndërfetar. Ai u takua me përfaqësues të komuniteteve të ndryshme fetare në Elbasan, të cilët kanë një Qendër të Bashkëpunimit Ndërfetar, që njihet për aktivizim të përbashkët në çështjet e komunitetit dhe shkëmbimit të vlerave fetare. Një ndër to është dhe Marshimi i Paqes, një aktivitet simbol i ndërveprimit qytetar të të gjitha besimeve fetare.
Presidenti e cilësoi këtë si një model të harmonisë ndërfetare mes shqiptarëve.
“I gëzuar që keni këtë harmoni ndërfetare dhe ndani së bashku vlerat fetare, si: besimin dhe vëllazërinë, respektin ndaj njëri-tjetrit. Faleminderit për këtë që bëni, për vlerat që përcillni. Të promovosh vlerën, kundrejt antivlerës, është mision i vështirë, por i shenjtë, edhe pse i kushtueshëm. Ne jemi njerëz të ndryshëm, që i përkasim bindjeve fetare të ndryshme, por kjo nuk mund e nuk duhet të na ndalojë të ulemi së bashku, të dialogojmë. Unë e shoh këtë organizim tuajin si model të përcjelljes së vlerave, të ndihmës së njerëzve. Përshëndes shumë marshimin e fillim vitit që ju organizoni, është i jashtëzakonshëm, është modeli i paqes, i respektit ndërfetar”.
Studio e piktorit Gazmend Xhaferri ishte ndalesa tjetër e Presidentit Begaj, ku u njoh me historinë e Elbasanit që kjo familje prej katër artistësh sjell në piktura, si ruajtje të traditës së piktorit Sefedin Xhaferri.
Gjatë vizitës në shkollën profesionale, mjeshtrit e ardhshëm të kuzhinës ekspozuan gatimet e tyre. “Unë jam i sigurt, – u shpreh Presidenti përpara nxënësve, që këtë shkollë profesionale e keni zgjedhur me dashuri, e kur gjërat bëhen me dashuri, bëhen më mirë. Ju keni një treg të madh që ju ofron mundësi të panumërta, por unë do të dëshiroja e do të uroja që ju të jeni kuzhinierët më të mirë të produkteve “Made in Albania””. Ai vizitoi në këtë shkollë edhe repartet e praktikës së mekanikëve.
Më pas, Presidenti u takua edhe me sipërmarrës të prodhimit dhe eksportit të kolltukëve, në “Today Sofa”, një kompani italiane e drejtuar nga shqiptarët, në të cilën punojnë rreth 75 persona.
Gjatë qëndrimit në Elbasan, Kreu i Shtetit vizitoi Muzeun Etnografik të Elbasanit, që njihet si “Shtëpia e Sejdinëve”, ndërtesë e shekullit të 18-të, si edhe kishën dhe manastirin e Shën Joan Vladimirit, ku kanë jetuar e punuar Kristoforidhi e shumë gjuhëtarë të tjerë veprimtarë të Elbasanit.
Gjatë vizitës së tij në Elbasan Presidenti u prit dhe u shoqërua nga Kryetari i Bashkisë Elbasan, z. Gledis Zllatja, Prefektja dhe Kryetarja e Qarkut.