Presidenti i Republikës Sh.T.Z Bajram Begaj pret Presidentin e Azerbajxhanit, Ilham Aliev në vizitën e tij të parë në Shqipëri

Shqipëria synon të shtojë bashkëpunimin me Azerbajxhanin në sektorët jetikë si energjia, infrastruktura dhe turizmi, si dhe të kthehet në një vend përfitues të transmetimit të gazit. Kjo u theksua sot në takimin e Presidentit të Republikës, Sh.T.Z Bajram Begaj me Presidentin e Azerbajxhanit, Sh.T.Z. Ilham Aliyev, gjatë vizitës së parë të një presidenti azer në Shqipëri. Diskutimet u fokusuan veçanërisht në nevojën për identifikimin e fushave të interesit të përbashkët dhe rrugët konkrete për thellimin e bashkëpunimit. Në takim u diskutua edhe për shtimin e vëllimit të furnizimit me gaz që kalon përmes Shqipërisë, gjë që do t’i kontribuonte sigurisë energjetike të Evropës edhe në këto kohëra të trazuara lufte. “Infrastruktura energjeitike dhe ajo e gazit, po bëhen gjithnjë e më të rëndësishme për të gjitha vendet. Gazsjellësi Adriatiko-Jonian, përmes TAP-it, lidh Shqipërinë me Malin e Zi, Kroacinë e Bosnjën, duke e kthyer vendin tonë në një shpërndarës dhe diversifikues rajonal të gazit me rëndësi gjeostrategjike në planin rajonal dhe evropian”, u shpreh Presidenti Begaj. “Bashkëpunimi mes dy vendeve tona përmes projektit të TAP-it, ka qenë i suksesshëm”, theksoi Kreu i Shtetit. “Kjo hap mundësi të reja bashkëpunimi, duke përfshirë procesin e gazifikimit të Shqipërisë. Master Plan-i i gazit, që vendi ynë ka miratuar, do të rishikohet për të parë të gjithë mundësitë për bashkëpunim. Shqipëria si vend tranzit, në kuadër të TAP-it synon të kthehet edhe në një vend përfitues të transmetimit të gazit. Presidenti Begaj nënvizoi, se viti i ardhshëm shënon edhe 30-vjetorin e vendosjes së marrëdhënieve diplomatike mes Shqipërisë dhe Azerbajxhanit, duke na dhënë mundësinë që ta shohim vitin 2023 si një vit ku bashkëpunimi ynë duhet të intensifikohet dhe shënojë zhvillime të reja. “Gjithashtu, diskutuam mbi propozimin e palës azere për hapjen e Ambasadës në vendin tonë. Ky është një propozim që ne e vlerësojmë si shenjë të konsolidimit të marrëdhënieve dhe nevojë për të përshpejtuar ritmin e bashkëpunimit si dy vende mike”, tha Presidenti Begaj. Të dy krerët e shteteve theksuan se turizmi përbën një sektor të rëndësishëm të ekonomive të dy vendeve tona dhe një fushë me interes të përbashkët. “Për të intensifikuar shkëmbimet në fushën e turizmit mes dy vendeve, folëm edhe për mundësitë e heqjes së vizave për qytetarët tanë. Ndamë mendimin, se kultura mbetet gjithmonë mënyra më e natyrshme për të afruar dy popuj”, theksoi Presidenti Begaj. Kreu i Shtetit i konfirmoi Presidentit Aliyev, se politika e jashtme e Shqipërisë mbështet paqen afatgjatë në rajonin e Kaukazit Jugor, zgjidhjen e mosmarrëveshjeve përmes diplomacisë dhe dialogut, me ndërmjetësimin e aktorëve të pranuar ndërkombëtarë, si BE, OKB, OSBE. Gjithashtu, Kreu i Shtetit theksoi, se Shqipëria mbështet integritetin territorial të Ukrainës dhe se vetëm zgjidhja paqësore dhe respektimi i ligjeve ndërkombëtare janë rruga e vetme për paqen afatgjatë. Ai u shpreh, se me Presidentin Aliyev biseduam për bashkëpunimin shumë të mirë mes dy vendeve tona në organizma të rëndësishëm ndërkombëtarë: OKB, OSBE, KiE (Këshilli i Evropës). Vlerësuam, se mbështetja e kandidaturave reciproke duhet të vijojë më tej edhe në të ardhmen. Përsa i përket rajonit tonë, i shpreha Presidentit mik Aliyev qëndrimin, se Kosova është tejet e rëndësishme për Shqipërinë. “Stabiliteti dhe përparimi demokratik i Kosovës është i rëndësishëm jo vetëm për Shqipërinë, por për stabilitetin dhe përparimin e gjithë rajonit tonë”, u shpreh Presidenti Begaj.