Presidenti i Republikës, Sh. T. Z. Bajram Begaj, me ligjvënësit britanikë të Dhomës së Lordëve dhe Komunëve
Presidenti i Republikës së Shqipërisë, Sh. T. Z. Bajram Begaj, priti sot një grup ligjvënësish nga Dhoma e Lordëve dhe Komunëve të Parlamentit Britanik, përfaqësues të partive të ndryshme politike.
Në takim u bisedua për marrëdhëniet dypalëshe, rritjen e bashkëpunimit ekonomik dhe situatën në rajon.
Presidenti Begaj vlerësoi marrëdhëniet e shkëlqyera midis dy vendeve dhe e cilësoi Mbretërinë e Bashkuar si “një avokate të proceseve integruese të Shqipërisë”.
Presidenti i Republikës falënderoi qeverinë britanike për mbështetjen e dhënë në disa qytete në Veri të Shqipërisë përmes projektit “Perspektiva të reja” për të rinjtë dhe bizneset, si dhe paraqiti vizionin e tij mbi të ardhmen për një zhvillim të qëndrueshëm të këtyre zonave.
Presidenti Begaj vlerësoi, gjithashtu, partneritetin mes dy vendeve në luftën kundër krimit të organizuar.