Presidenti Begaj pranon Letrat Kredenciale të Ambasadorit të ri të Mbretërisë së Belgjikës
Presidenti i Republikës, Sh. T. Z. Bajram Begaj, priti sot Ambasadorin e ri të Mbretërisë së Belgjikës, Sh. T. Z. Paul Lambert, jo rezident në Shqipëri, të cilit i pranoi Letrat Kredenciale.
Presidenti Begaj shprehu besimin se edhe në mungesë të një ambasade belge në Tiranë, marrëdhëniet mes Shqipërisë dhe Belgjikës do të vijojnë të përmirësohen duke u zgjeruar edhe në nivel ekonomik.
Gjatë bisedës me ambasadorin belg Lambert, turizmi u vlerësua si një nga sektorët më dinamikë. Presidenti i Republikës theksoi se numri i vizitorëve belgë në vendin tonë është rritur dhe në vijim nevojitet bashkëpunim për të ruajtur këtë trend. Një efekt pozitiv në këto shkëmbime vjen edhe nga fluturimet direkte ndërmjet Brukselit dhe Tiranës.
Në lidhje me bashkëpunimin mes Shqipërisë dhe Belgjikës për sa i përket integrimit evropian, Presidenti Begaj i përcolli ambasadorit Lambert përgëzimet për mbështetjen e dhënë në këtë proces.
Shqipëria, – theksoi Presidenti Begaj, po bën progres të dukshëm, dhe pas hapjes së negociatave për grup-kapitujt themelorë synon të përparojë me tej me reformat, ndërsa paralelisht po përfiton edhe nga zbatimi i Planit të Rritjes, i cili pritet t’i japë një shtysë zhvillimit të vendit.