Përzgjidhen me short në Institucionin e Presidentit të Republikës anëtarët e rinj të Këshillit të Emërimeve në Drejtësi

Në mjediset e Institucionit të Presidentit të Republikës u zhvillua sot procedura e hedhjes së shortit për përzgjedhjen e anëtarëve të Këshillit të Emërimeve në Drejtësi (KED) që do të zhvillojë veprimtarinë e tij përgjatë vitit 2023, në përputhje me kompetencat e përcaktuara në nenin 149/d i Kushtetutës së Republikës së Shqipërisë si dhe të pikave 7-10 të nenit 221 të ligjit 115/2016 “Për organet e qeverisjes së sistemit të drejtësisë”, i ndryshuar. Gjatë kësaj procedure morën pjesë Avokatja e Popullit, në cilësinë e vëzhguesit, Kryetari i Këshillit të Lartë të Prokurorisë, zëvendëskryetari i Këshillit të Lartë Gjyqësor, përfaqësues nga Kuvendi i Shqipërisë, Gjykata Kushtetuese si dhe nga dhe Delegacioni i Bashkimit Europian në Shqipëri dhe OPDAT. Nga hedhja e shortit u përzgjodhën si anëtarë të KED përkatësisht: Z. Altin Binaj Gjyqtar në Gjykatën Kushtetuese Znj. Fjona Papajorgji Gjyqtare në Gjykatën Kushtetuese Z. Sandër Simoni Gjyqtar në Gjykatën e Lartë Z. Arqilea Koça Prokuror nga Prokuroria e Përgjithshme Z. Fuat Vjerdha Gjyqtar në Gjykatat e Apelit Z. Engert Pëllumbi Gjyqtar në Gjykatën e Apelit Znj. Arta Marku Prokurore nga Zyrat e Prokurorive pranë Gjykatave të Apelit Z. Gjon Fusha Prokuror nga Zyrat e Prokurorive pranë Gjykatave të Apelit Znj. Enerjeta Shehaj (Deraj) Gjyqtare nga Gjykatat Administrative Përveç nëntë anëtarëve, në përputhje me përcaktimet ligjore, shorti përcaktoi edhe gjashtë anëtarët zëvendësues të KED, si më poshtë: Znj. Vitore Tusha Gjyqtare në Gjykatën Kushtetuese Znj. Albana Boksi Gjyqtare në Gjykatën e Lartë Znj. Alma Muça Prokurore nga Prokuroria e Përgjithshme Z. Genti Shala Gjyqtar në Gjykatat e Apelit Z. Moisi Duda Prokuror nga Zyrat e Prokurorive pranë Gjykatave të Apelit Znj. Elda Vrioni Gjyqtare nga Gjykatat Administrative Këshilli i Emërimeve në Drejtësi (KED) është organ i pavarur, i parashikuar në Kushtetutë, që kryen verifikimin e kushteve ligjore dhe vlerëson kriteret profesionale e morale të kandidatëve për Inspektor të Lartë të Drejtësisë si dhe të kandidatëve për anëtarë të Gjykatës Kushtetuese. KED përbëhet nga nëntë anëtarë, të përzgjedhur me short nga radhët e gjyqtarëve dhe prokurorëve, të cilët plotësojnë kushtet dhe kriteret ligjore.