“Gruaja, shpirti i thesareve tona etnografike”, një aktivitet për Ditën Kombëtare të Trashëgimisë Kulturore me veshje të rralla popullore nga Veriu në Jug, nga Ulqini në Çamëri, nga Kosova në Kalabri
Institucioni i Presidentit të Republikës zhvilloi për të dytin vit radhazi aktivitetin “Gruaja, shpirti i thesareve tona etnografike” në kuadër të Ditës Kombëtare të Trashëgimisë Kulturore.
Ky aktivitet u organizua nën kujdesin e Zonjës së Parë, Armanda Begaj, me synim promovimin e veshjeve popullore shqiptare, nderimin dhe ruajtjen e trashëgimisë etnografike.
Pjesëmarrës ishin zonja me kontribut në jetën kulturore shqiptare, ambasadorët dhe gratë e ambasadorëve që shërbejnë në vendin tonë, si edhe personalitete nga fusha të ndryshme të artit.
Veshjet tradicionale nga të gjitha krahinat e Shqipërisë, nga Kosova, si edhe veshjet arbëreshe shfaqën larminë dhe origjinalitetin e tyre bashkë me elementë me vlera kulturore dhe artistike. Vajzat e Miss Globe 2024, përfaqësuese të kurorave të bukurisë së vendeve të tyre, veshën me shumë hijeshi e dashuri kostumet tradicionale shqiptare.
Kostumet e mrekullueshme shqiptare, dëshmi e zhvillimit të hershëm të zejtarisë artistike, dijebërjes, endjes e qëndismave, do t’i shijojnë, në saje të kësaj sfilate, shikues nga e gjithë bota.
Zonja e Parë, Armanda Begaj, gjatë fjalës përshëndetëse në këtë aktivitet, u shpreh: “Ne shqiptarët kemi trashëguar ndër shekuj e breza një pasuri të madhe të veshjeve popullore, të cilat, përgjatë proceseve të ndryshme të zhvillimit historik, social e kulturor, krijuan dhe fizionominë tonë”.
Zonja e Parë vlerësoi në veçanti gratë që marrin përsipër riprodhimin e veshjeve popullore, duke ruajtur me fanatizëm origjinalitetin e tyre.
“Ndonëse në kushte krejtësisht të reja, identifikimi nëpërmjet veshjeve tradicionale mbetet një dëshirë e shumë të rinjve shqiptarë kudo ku ata ndodhen nëpër botë”, – u shpreh Zonja Begaj, e cila theksoi se gjithsecili jep kontribut në ruajtjen dhe përcjelljen e trashëgimisë kulturore.
“Kemi mundësi që kulturën materiale dhe shpirtërore, etnografinë shqiptare, ta ruajmë me fanatizëm, ta përçojmë e ta përhapim. Le ta përdorim historinë tonë të lashtë dhe të pasur si brez për të qëndruar drejt në çdo kohë, krenar për kombin shqiptar. Ta bëjmë këtë për brezat e ardhshëm”.
Pasi ndoqën sfilatën e veshjeve popullore të shoqëruara nga vallet e krahinave përkatëse, të pranishmit ndanë mbresat, opinionet dhe eksperiencat e tyre në lidhje me etnografinë, ruajtjen dhe trashëgiminë kulturore shqiptare.
