Betohet para Presidentit të Republikës, gjyqtari më i ri i Gjykatës Kushtetuese, zoti Ilir Toska
Në Institucionin e Presidentit të Republikës u zhvillua ceremonia e betimit para Presidentit të Republikës, Sh. T. Z. Bajram Begaj të anëtarit të ri të Gjykatës Kushtetuese, z. Ilir Toska.
Pas ekzekutimit të himnit kombëtar dhe leximit të vendimit përkatës të emërimit të tij, Gjyqtari Toska me dorën mbi Kushtetutën e Shqipërisë u betua para Presidentit të Republikës se: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”.
Presidenti Begaj i uroi suksese zotit Ilir Toska, në detyrën e re të anëtarit të Gjykatës Kushtetuese.
Në ceremoninë solemne të betimit ishin të pranishëm Kryetarja e Gjykatës Kushtetuese, znj. Vitore Tusha, Zëvendëskryetari i Gjykatës së Lartë, z. Sokol Sadushi, Kryetari i Këshillit të Emërimeve në Drejtësi, z. Sokol Binaj, Këshilltari Ligjor Rezident i OPDAT pranë Ambasadës së SHBA-së në Tiranë, z. Constantine Soupios, kreu i Sektorit Politik në Delegacionin e BE-së në Tiranë, z. Alexis Hupin, si dhe anëtarë të Kabinetit të Presidentit të Republikës.