Anëtari i ri i Gjykatës Kushtetuese, z. Altin Binaj betohet para Presidentit të Republikës

Anëtari i ri i Gjykatës Kushtetuese, z. Altin Binaj betohet para Presidentit të Republikës

Në Institucionin e Presidentit të Republikës u zhvillua sot ceremonia e betimit para Kryetarit të Shtetit, Sh.T.Z. Ilir Meta, të anëtarit të ri të Gjykatës Kushtetuese të zgjedhur nga Kuvendi i Shqipërisë, z. Altin Binaj.

Pas ekzekutimit të himnit kombëtar, gjyqtari Binaj duke vendosur dorën mbi Kushtetutën e Shqipërisë u betua para Presidentit Meta se: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”.

Presidenti i Republikës i uroi suksese dhe punë të mbarë anëtarit të ri të Gjykatës Kushtetuese në detyrën e tyre shumë të rëndësishme e me përgjegjësi të lartë.

Në ceremoninë solemne të betimit ishin të pranishëm Kryetari i Kuvendit të Shqipërisë, Sh.T.Z. Gramoz Ruçi, kryetarja në detyrë e Gjykatës Kushtetuese, znj. Vitore Tusha, Avokati i Popullit, znj. Erinda Ballanca dhe drejtuesja e misionit OPDAT të Ambasadës së SHBA në Tiranë, znj. Michelle Lakomy.