Presidenti Meta pritet në takim nga Kryetari i Kuvendit të Komunës Rozhajë dhe Zv/kryeministri i Malit të Zi

Presidenti Meta pritet në takim nga Kryetari i Kuvendit të Komunës Rozhajë dhe Zv/kryeministri i Malit të Zi

Rozhajë, Mal i Zi
Presidenti i Republikës, Sh.T.Z Ilir Meta u prit sot në një takim nga Kryetari i Kuvendit të Komunës Rozhajë në Malin e Zi, z. Amir Avdiç. Të pranishëm në këtë takim ishin edhe Zëvendëskryeministri i Malit të Zi, z. Rafet Husoviç, Ministri i Infrastrukturës, z. Osman Nurkoviç, si edhe deputetë.
Duke i uruar mirëseardhjen Presidentit Meta, z.Avdiç theksoi se: “Për banorët e Komunës së Rozhajës, kjo është një vizitë tepër e rëndësishme dhe dëshmi e qartë e marrëdhënieve historike e tradicionale, tepër të mira midis shqiptarëve dhe malazezëve. Uroj që vizita për herë të parë e një Presidenti të Shqipërisë në këtë zonë të gjenerojë impulse të reja për forcimin e këtyre marrëdhënieve”.
Presidenti Meta, pasi falënderoi autoritetet qendrore e vendore si edhe banorët për pritjen e ngrohtë, shprehu kënaqësinë që viziton për herë të parë Komunën e Rozhajës.
“Jam shumë i lumtur që vij në Rozhajë për herë të parë dhe të ndaj së bashku me ju gëzimin për miqësinë që ekziston midis dy popujve dhe vende tona. Pakicat kombëtare janë një pasuri e madhe, një vlerë e shtuar për të gjithë ne dhe më vjen mirë që dy vendet tona janë një shembull i respektimit të të drejtave të tyre në rajon.
Bashkëjetesa dhe fqinjësia mes shqiptarëve e malazezëve, si në Shqipëri e Mal të Zi, por edhe në Kosovë, është një udhërrëfyes i mirë për bashkëjetesën me pakicat e minoritetet kombëtare në Ballkan.
Shqiptarët në Mal të Zi kanë një kontribut të jashtëzakonshëm për këtë shtet, veçanërisht për Pavarësinë e tij si dhe për proceset integruese të Malit të Zi në familjen euro-atlantike dhe kjo është një arsye që na bën krenarë”, – nënvizoi mes të tjerash Presidenti Meta, i cili gjithashtu falënderoi autoritetet malazeze edhe për mikpritjen e shqiptarëve të Kosovës gjatë konfliktit të vitit 1999.
Zv/kryeministri i Malit të Zi, Rafet Husoviç, i pranishëm në takim, pasi vlerësoi kontributin e Presidentit Meta për forcimin e mëtejshëm të marrëdhënieve mes dy vendeve, theksoi se “më vjen mirë të pohoj se fara e mirë e mbjellë e harmonisë e bashkëjetesës mes shqiptarëve e malazezëve do të lulëzojë edhe më shumë në të ardhmen”.