Ambasadori i Kroacisë, Sh. T. Z. Zlatko Kramarić i paraqet Letrat Kredenciale Presidentit Meta

Ambasadori i Kroacisë, Sh. T. Z. Zlatko Kramarić i paraqet Letrat Kredenciale Presidentit Meta

Presidenti i Republikës, Sh.T.Z. Ilir Meta priti në një takim Ambasadorin e ri të Kroacisë në Tiranë, Sh. T. Z. Zlatko Kramarić, me rastin e paraqitjes së Letrave Kredenciale.

Duke i uruar mirëseardhjen dhe suksese në detyrë, Presidenti Meta e siguroi Ambasadorin Kramarić për një bashkëpunim të ngushtë në përmbushje të misionit të tij në Shqipëri.

Gjatë takimit, Presidenti Meta vlerësoi marrëdhëniet tradicionalisht shumë të mira e miqësore me Kroacinë, të cilat janë model për rajonin tonë.

“Këto marrëdhënie, tashmë të një Partneriteti Strategjik, mbështeten në lidhjet e forta historike mes dy kombeve e bazohen te përparësia jonë e përbashkët e politikës së jashtme – kontributi për një rajon të qëndrueshëm, paqësor dhe të begatë dhe vizioni i përbashkët euroatlantik”, – u shpreh Kreu i Shtetit.

Duke ju referuar kontributit të Diasporës shqiptare në zhvillimet dhe progresin e Kroacisë, Presidenti Meta vlerësoi se ajo është një urë e vërtetë miqësie që do të shërbejë për të nxitur më tej lidhjet tona dhe marrëdhëniet në çdo fushë.

Gjithashtu, Presidenti Meta vlerësoi se ka ende potencial të pashfrytëzuar sa i përket shkëmbimeve tregtare dhe bashkëpunimit ekonomik ndërmjet Kroacisë dhe Shqipërisë.

“Duhet të angazhohemi bashkërisht në rritjen e tyre, për t’i paraprirë investimeve, duke patur parasysh potencialin e Shqipërisë, veçanërisht në fushën e infrastrukturës dhe turizmit”, – theksoi Kreu i Shtetit.

Kreu i Shtetit falënderoi autoritetet kroate për angazhimin e menjëhershëm pas tërmetit të 21 shtatorit, solidaritetin e treguar dhe dërgimin e ndihmave humanitare.

Gjithashtu, Presidenti Meta e falënderoi Ambasadorin Kramarić për mbështetjen e Kroacisë në procesin e integrimit europian të Shqipërisë.