Kabineti

Sekretari i Përgjithshëm

Alqi Bllako,
ka lindur në Kolonjë, më 10 maj 1987.

Ka përfunduar studimet e larta pranë Universitetit të New York-ut në Tiranë, si dhe ka kryer disa studime pasuniversitare, Master Shkencor në drejtimin Financë dhe Kontabilitet nga Universiteti i New York-ut dhe Master Business Administration me drejtim Bankë dhe Tregje Financiare në bashkëpunim me Institutin “Kurt Bosch” në Zvicër; diplomuar në të treja rastet si student i shkëlqyer.

Gjatë kësaj periudhe, zoti Bllako është vlerësuar me Çmimin e Parë nga Guvernatori i Bankës së Shqipërisë për punimin e tij “Roli i tatimit mbi të ardhurat e kompanive mbi strukturën e kapitalit: të dhëna mbi ekonominë shqiptare”, i konsideruar një kontribut i vyer akademik.

Është vlerësuar nga ekspertët më të mirë akademikë në fushën financiare dhe ka dhënë ndihmesën e tij si lektor i brendshëm dhe i jashtëm pranë Universitetit të New York-ut në Tiranë në lëndët: Financa e Korporatave, Financa Ndërkombëtare, Kontabilitet Financiar, si dhe Kontabilitet Drejtimi.

Zoti Bllako ka pasur përvojë të drejtpërdrejtë në sektorin privat dhe institucionet publike. Ka qenë përfaqësues i vendit në konventa të shumta ndërkombëtare, si dhe është dalluar për kontributin e tij në shoqërinë civile.

Ka punuar si Sekretar i Përgjithshëm në Ministrinë e Mjedisit, gjatë periudhës: shtator 2013 – korrik 2017 ku ka filluar dhe udhëhequr reforma të rëndësishme administrative dhe politike, duke përballuar me sukses sfidën e rritjes së efekshmërisë së punës së kësaj Ministrie, duke garantuar rrugën drejt një zhvillimi të qëndrueshëm të mjedisit shqiptar.

Me firmosjen e marrëveshjes së Parisit, zoti Bllako ka shërbyer dhe si autoriteti i deleguar kombëtar në marrëdhëniet me Fondin e Klimës, si dhe pikë kryesore për Konventën e Diversitetit Biologjik, ku ka luajtur rol aktiv pranë organit ndërqeveritar ndihmës të kësaj konvente: Trupi Ndihmës për Këshillat Shkencore, Teknike dhe Teknologjike.

Njeh dhe flet rrjedhshëm gjuhët: angleze dhe italiane.